મુચરકો જપ્ત થાય ત્યારે કાયૅરીતિ

(૧) જયારે

(એ) આ સંહિતા હેઠળનો મુચરકો ન્યાયાલય સમક્ષ હાજર રહેવા માટેનો અથવા મિલકત રજૂ કરવા માટેનો હોય અને તે ન્યાયાલયને અથવા પાછળથી તે કેસ જેને મોકલવામાં આવેલ હોય તે ન્યાયાલયને ખાતરી થાય એવી રીતે સાબિત કરવામાં આવે કે મુચરકો જપ્ત કરવામાં આવેલ છે અથવા (બી) આ સંહિતા હેઠળના બીજા કોઇપણ મુચરકાની બાબતમાં જે ન્યાયાલયે મુચરકો લીધેલ હોય તે ન્યાયાલયને અથવા પાછળથી તે કેસ જેને મોકલવામાં આવેલ હોય તે કોઇ ન્યાયાલયને અથવા પહેલા વર્ગના કોઇ મેજિસ્ટ્રેટના ન્યાયાલયને ખાતરી થાય એ રીતે સાબિત કરવામાં આવે કે મુચરકો જપ્ત કરવામાં આવેલ છે. ત્યારે ન્યાયાલયે એવી સાબિતીના કારણો નોંધવા જોઇશે અને એવા મુચરકાથી બંધાયેલ કોઇપણ વ્યકિતને તેની શિક્ષાત્મક રકમ ભરી આપવા અથવા શા માટે તે ન ભરવી તેનું કારણ દર્શાવવા તે ફરમાવી શકશે.

સ્પષ્ટીકરણઃ- ન્યાયાલય સમક્ષ હાજર થવા માટેના અથવા મિલકત રજૂ કરવા માટેના મુચરકાની શરતમાં જેને પાછળથી તે કેસ મોકલવામાં આવે તેવી કોઇ ન્યાયાલય સમક્ષ યથાપ્રસંગ હાજર રહેવા માટેની અથવા મિલકત રજૂ કરવા માટેની શરતનો સમાવેશ થાય છે એવો અર્થ કરવામાં આવશે.

(૨) પુરતુ કારણ દર્શાવવામાં ન આવે અને મુચરકાની શિક્ષાત્મક રકમ ભરી દેવામાં ન આવે તો ન્યાયાલય તે રકમ આ સંહિતા હેઠળ પોતે કરેલ દંડ હોય તેમ તે વસૂલ કરવાની કાયૅવાહી કરી શકશે.

પરંતુ આવો દંડ ભરવામાં ન આવે અને તે ઉપર્યુકત રીતે વસૂલ કરી શકાય તેમ ન હોય ત્યારે જામીન તરીકે તેવી બંધાયેલી વ્યકિત દંડ વસૂલ કરવાનો આદેશ આપતા ન્યાયાલયના હુકમથી છ મહિનાની મુદત સુધી દીવાની જેલમાં કેદની સજાને પાત્ર થશે.

(૩) ન્યાયાલય તેવું કરવા માટેના તેના કારણો નોંધ્યા બાદ ઉપર જણાવેલી શિક્ષત્મક રકમનો કોઇ ભાગ માફ કરી શકશે અને બાકીનો ભાગ જ વસૂલ કરી શકશે.

(૪) કોઇ મુચરકો જપ્ત થાય તે પહેલાં તેના જામીન મૃત્યુ પામે તો તેની એસ્ટેટ તે મુચરકા અંગેની તમામ જવબદારીમાંથી મુકત થશે.

(૫) જેણે કલમ-૧૨૫ કે કલમ-૧૩૬ કે કલમ-૪૦૧ હેઠળ જામીનગીરી આપી હોય તે વ્યકિત જે ગુનો કરવાથી તેના મુચરકાની અથવા કલમ-૪૯૪ હેઠળના તેના મુચરકાને બદલે તેણે કરી આપેલા મુચરકાની શરતોનો ભંગ થાય એવા ગુના માટે દોષિત ઠરે તો તે ગુના માટે તેને દોષિત ઠરાવનારા ન્યાયાલયના ફેંસલાની પ્રમાણિત નકલ તેના જામીનો સામેની આ કલમ હેઠળની કાયૅવાહીમાં પુરાવા તરીકે ઉપયોગમાં લઇ શકાશે અને જો એવી પ્રમાણિત નકલનો એ રીતે ઉપયોગ કરવામાં આવે અને એથી વિરુધ્ધનું સાબિત ન થાય તો ન્યાયાલયે માની લેવું જોઇશે કે તેણે એવો ગુનો કર્યો હતો.